როგორ გავიცნოთ ადამიანი ტანისამოსის ფერის მიხედვით?

რას ნიშნავს ტანისამოსის ფერი?
თუ საკუთარ გარდერობში შევიხედავთ, ალბათ შევამჩნევთ, რომ ტანისამოსის 1 ან 2 ფერი ჭარბობს. რათქმაუნდა, ეს შემთხვევითი არაა. უკვე დიდი ხანია დადგენილია, რომ საყვარელი ფერით შეიძლება დავადგინოთ ადამიანის ხასიათი და მისი თვისებები.
ფსიქოლოგიის წიგნებში ბევრი წერია ამის შესახებ. ვკითხულობ და ვცდილობ საკუთარ თავზე, მეგობრებზე, ოჯახის წევრებზე შევამოწმო. ალბათ დაუჯერებელია, მაგრამ 90% ემთხვევა.
ესეიგი:

წითელი ფერი - უყვართ გაბედულ, ძალაუფლების მოყვარულ, ემოციურ ადამიანებს. თუმცა ხდება ხოლმე, როცა ადამიანს სურს გათავისუფლდეს კომპლექსებისგან, მორცხვობისგან, იცვამს წითელ ფერს.
თუ გვსურს ვიყოთ ყურადღების ცენტრში და თავს კომფორტულად ვგრძნობდეთ, წითელი ჩვენთვისაა. ამ ფერის ტანისამოსში გამოწყობილი ადამიანი შეუმჩნეველი არასდროს დარჩება.
ქალი, რომელიც ამ ფერის ტანისამოსს ანიჭებს უპირატესობას სექსუალურია. ადამიანებს კი, რომლებსაც ეს ფერი აღიზიანებთ, ეშინიათ ჩხუბის და კონფლიქტების.

თეთრი ფერი - მას იდეალურ ფერსაც კი უწოდებენ, რადგან იგი ყველა ფერის სინთეზია. თეთრი ფერი ზოგადად მშვიდობისმოყვარულ, სუფთა, უბოროტო ადამიანებთან ასოცირდება. თუმცა არ უნდა დაგვავიწყდეს სხვადასხვა ეროვნების ადამიანებს ამ ფერთან სხვადასხვა ასოციაციები აქვთ.

შავი ფერი - ადამიანები, რომელთა გარდერობში ეს ფერი დომინირებს, ხშირად დაკომპლექსებულები არიან და დიდი სურვილი აქვთ დაემალონ რეალობას. არ აქვთ საკუთარი თავის რწმენა და არ არიან გახსნილები ურთიერთობაში. მაგრამ! ქალებმა კარგად ვიცით შავი ფერის მაგიური ძალა. იგი ფიგურას მიმზიდველს და ლამაზს ხდის, ზედმეტ კილოგრამებს ფარავს, რაც ძალიან სასიამოვნოა. ამიტომაც მშვენიერი სქესის წარმომადგენლები ირჩევენ მუქი ფერის კაბებსა თუ შარვლებს.
ყოველდღიურ ტანისამოსში შავი ფერი დეპრესიულს ხდის ადამიანს და ბევრ ენერგიას ართმევს, ამიტომ ვეცადოთ ეს ფერი ჩვენს ყოველდღიურ გარდერობში არ დომინირებდეს.

ნაცრისფერი - სერიოზული ადამიანების ფერია. ამ ფერის მოყვარულებს დიდხანს მსჯელობა უყვართ და ნაჩქარევ გადაწყვეტილებებს არასდროს იღებენ. ფხიზლად უყურებენ ცხოვრებას და მათში უნდობლობა იმჩნევა ადამიანების მიმართ.
ამავდროულად ეს ფერი ქმნის ოფიციალურ გარემოს და სამუშაო ხასიათს გვიქმნის.

ყავისფერს - ხშირად იყენებენ საკუთარი გემოვნებისადმი უნდობლობით განწყობილები და საკუთარი სტილის მაძიებლები. ეს ფერი შეუმჩნეველია, თუმცა სიმშვიდის მომტანი. ყავისფერი ტანისამოსის მოყვარული ქალები მამაკაცებს სუსტ და დაუცველ არსებებად მიაჩნიათ.

ვარდისფერი - ითვლება სიცოცხლის, სიკეთის ფერად. იგი რომანტიკული ადამიანებისაა, რომელთაც ურთიერთობაში სინაზე და ზრუნვა იზიდავთ.
ასევე ამ ფერის მოყვარულთ ახასიათებთ კომუნიკაბელურობა, ემოციური ხასიათი და ურთიერთობაში ხშირად ეგოიზმს ავლენენ.

ლურჯი, ცისფერი - ზღვის, ცის ფერი. მშვიდი, გაწონასწორებული ადამიანებისაა, თუმცა ისინი ამავდროულად საოცრად ვნებიანები არიან)) ახასიათებთ ბევრი ემოცია, რომანტიზმი, ღია ურთიერთობები, კომუნიკაბელურობა, განვითარებული ინტუიცია.

იასამნისფერი - ამ ფერის მოყვარულებს მდიდარი შინაგანი სამყარო აქვთ. არ გამოირჩევიან გახსნილი ურთიერთობებით და დიდ დროს უთმობენ საკუთარი თავის გაცნობას. არიან რომანტიულები, აქვთ მისწრაფება აღმოაჩინონ სიახლე და ყველაფერში აზრს ეძებენ.